ADD+ (已結業)

藝術館休閑半日，行到腳攰肚仔餓，見B1層有間餐廳就坐低休息下。估唔到食物選擇都好多元化，有中式如：炒粉麵飯粥、點心、雞蛋仔…，又有西式如：意粉、薄餅、扒類、甜品等，一應俱全。以為好似大多旅遊點food court咁，價錢唔平但食物質素一般，點知有驚喜。蜂蜜叉燒蛋飯 叉燒肥瘦比例平均，肉嫩多汁，醃製做得好所以就咁食都好夠味，沾上醬汁就更加惹味，配上蛋炒飯底，做到飯粒分明唔馬虎。本來只係抱住食價錢貴既碟頭飯心態，但食過就覺得店舖對出品有要求。清新柚子撻 一入口就食到清甜柚子味，同蛋白霜半半比例，平衡甜度唔會太膩，但SIZE約只有女性手掌一半,性價比不高。曲奇奶昔做法正常一杯奶昔，由牛奶、雪糕/忌廉，加上曲奇制成，甜度十足，同樣性價比不高。熱美式咖啡原本簡單一杯美式咖啡，店家細心配上經典蔗糖、朱古力粒、糖醬同一杯水，細心有驚喜。