功夫點心

營業中

休息中

咁啱行開深水埗電腦中心， 就喺附近隨便搵地方食嘢。 當時大概下晝五點， 我哋兩個人行到入店舖， 雖然冇乜人理會我哋， 但都理解嘅， 事關見到啲員工坐低食緊飯。 坐低之後， 店員攞咗一壺茶同一壺水畀我哋， 其中一個茶壺上面係有啲食物殘漬，唉…… 我心諗: 算啦， 又唔係話去啲極高級嘅食肆， 比一百幾十蚊， 唔能夠太高要求。 細看檯面上嘅 墊枱紙， 原來先發現呢間點心店係有好多間分店， 所以雖然我對店舖環境及服務員質素唔會有太大期望， 反而對食物質素覺得會有啲保證。 第一碟餸上嚟嘅點心係腐皮卷， 雖然有啲油， 但味道總算中規中矩。 第二碟輪到蝦餃， 蝦餃皮望落幾薄， 脹卜卜望落去好多蝦， 我咬咗一啖， 奇怪見到有少少黑色嘢， 用筷子撩開…… 入面竟然有隻曱甴， 我即時頭暈兼反胃！ 實在太過份！ 唯有即時叫埋單， 店員見狀同我講咗幾句對唔住， 跟住叫咗經理過嚟， 經理過嚟講咗兩句對唔住就行開咗。 疫情底下， 好多有質素嘅食店都捱唔住要結業， 一間連鎖式經營嘅食店，竟然咁唔注重食物嘅衛生， 實在太過份