無名拉麵 (已結業)

日日午市都有人龍，品質都應該有番咁上下。拉麵店黎講，湯底嘅選擇佢算係多，豬骨，味噌，蝦湯，蟹湯，辛辣，鍾意海鮮湯底就要試試。海老味噌湯都試過幾次，蝦湯反而未試過，而蟹湯就第一次見。蝦湯深啡色湯，有櫻蝦, 入口蝦味濃到甘，佢唔鹹，但味超濃，濃過星洲laksa蝦湯，少少腥, 飲得多有啲膩。蟹湯讚!讚!讚!冇蝦湯咁濃，有少許甜，蟹味啱啱好, 完全唔腥, 比蝦湯creamy好多，入口順滑，最後我連湯都飲哂。豚骨湯有肉味兼且唔太油，層次分明，有野菜嘅甜味，口感偏薄。叉燒薄切，用焗爐(salamander)烘過，有油香但偏鞋。豚拖羅即豚臉肉，香港叫肉青，近豬頸肉但比頸肉油份分佈均勻。同樣烘過先上碟，入口即溶，冇筋，但脂肪含量極高，有少許豬臊味，多吃會膩。麵有粗幼軟硬選擇，幼麵硬麵可以再硬啲, 粗麵硬麵很不錯。荀未夠爽脆，有啲冧，有啲筋。蔥，芽菜選用博多蔥及獲獎芽菜，小弟未有能力食出箇中分別。溏心蛋賣相味道達門檻總括係，蟹湯一定要試，蝦湯齒頰留香，豚骨湯層次分明，豚拖羅可以一試，其他中規中矩。仲有, 果兩位女店員好man, man到有時覺得佢地冇禮貌, 說話冇尾音, 面偏黑, 長期將笑容埋藏於內心。