牛市 (已易手)

終於轉涼，飲碗熱湯真係好緊要！行過呢間舖頭就聞到好濃牛味，有少少似賣牛雜的小食舖的味，所以就入黎試下~入去食嘅時候已經係下午茶時段，所以老細得閒可以同我哋傾下閒偈，佢推薦我哋食崩沙腩因為新鮮嘅比較少，男朋友就要左個咖哩牛腩粉配套餐~講真，崩沙腩真係聽就聽得多，食真係未食過！崩沙腩係牛嘅橫膈膜附近，比較少有，所以都會比較貴；我覺得幾有咬口但牛味唔算出！牛湯調返轉頭比較出色！聽老細講，係用大量牛骨每日煲成十幾個鐘頭，無落味精；聞落已經聞得出好大陣牛味，飲落更加唔駛講，好鮮甜！唔好話用牛湯嚟煮河粉，就算就咁煮蘿蔔都好好食！椰香咖哩裏面有薯仔，紅蘿蔔，牛腩；咖哩好重椰香味，第一啖會覺得甜甜地，後勁就會有些少咖哩嘅辛辣味！薯仔、紅蘿蔔、牛腩全部都入曬咖哩味！米粉一樣係用牛骨湯，牛骨湯同埋咖哩完全冇撞味，加埋一齊食完之後會成身暖笠笠~套餐會跟一杯餐飲，五香牛輾，流心蛋~五香牛輾最出色，因為每一塊牛輾都好入味，而且老細切得厚薄均勻，食曬都唔會特別覺得膩！糖心蛋就有滷水滷過~就算餐飲都係老細一家自製，所以配搭都幾特別~金羅漢果花旗參茶飲落甘甜，好重花旗參味，蔘味散咗之後羅漢果有一種甘甜味慢慢咁滲出嚟，