皇苑 (已結業)

嚟到筲箕灣嘅選擇真係多，由街頭小食到特色餐廳，應有盡有！不過，今日就去到一間新開嘅酒樓－－皇苑，試吓小菜，睇吓佢應唔應該留低啦！瑪卡螺頭燉雞湯：原盅燉湯，熱辣辣，仲好足料添，好暖好滋潤呀！A姐一飲完就問，乜馬卡龍都可以煲湯咩？！真係攞你命三千！唔係馬卡龍，係被稱為「秘魯人參」嘅瑪卡，餐牌仲詳細寫明瑪卡嘅營養價值，食完會補充精神同無咁易疲勞，啱晒我呢啲日做夜做打工仔！懷舊拔絲骨：拔絲番薯就食過喇，拔絲骨就真係第一次。上碟見到有青椒、紅椒、香桃同洋蔥伴碟，當然唔少得炸到金黃色嘅主角拔絲骨啦！呢個菜淨係睇已經色彩繽紛，已經忍唔住即刻挾一件嚟試，成條糖絲拉出嚟，望見都好驚好甜，好彩酸甜平衡啱啱好，啖啖肉仲好香脆添！但記住要趁熱食，如果唔係糖漿變硬就後悔莫及！沙嗲粉絲蟹煲：煲蓋一打開就聞到好香濃嘅沙嗲味，成隻蟹加埋大量粉絲，份量一啲都唔輸蝕！不過，蟹蓋就唔見膏，好彩肉都唔少，仲好鮮甜添！而粉絲就係A姐最愛，索晒沙嗲味好正呀！咕嚕蝦球：脆卜卜得嚟又唔厚粉，蝦肉好爽，又酸、又甜、鑊氣一流，最重要係唔會多汁到一pat pat，唔錯。