英王麵包店 (已結業)

上文提要吓，事緣小組簡簡單單搞飲茶，嚟到九龍城廣場嘅佳寧娜，為咗順道幫埋是月生日嘅組員慶祝，一早預訂好英王麵包店（A1 Bakery）嘅蛋糕，就晌九龍城廣場嘅分店取貨，當作飯後甜品。朋友所揀嘅喺「石板街」朱古力忌廉蛋糕（$188，早一日預訂有九折），有蛋糕食，當然皆大歡喜 。餅面有朱古力忌廉唧花、棉花糖、杏仁、朱古力豆做裝飾，買相唔算好花巧，但都幾精緻，尤其對小朋友而言，已經相當吸引，加上當作生日蛋糕，個個爭住吹蠟燭。切開個「石板街」結構好簡單，朱古力海綿蛋糕配朱古力忌廉，中間嘅朱古力忌廉加有棉花糖、朱古力粒及杏仁粒。啖啖都充滿朱古力香 ，海綿蛋糕入口鬆軟，朱古力忌廉打得亦夠軟滑，味道不俗，當然，驚喜欠奉。雖然A1有唔少分店，亦喺大集團支持，集團旗下更有唔少品牌，不過，要做到包餅界「阿一」（A1）還有段極漫長之路 。