囍公館 (已結業)

最近同朋友去西九文化區享受大自然，去到發現大草地擺咗好多提子，影完相攤唞完之後就周圍行下睇下文化區有咩餐廳食吓嘢。最後揀咗呢間位於海邊嘅囍公館，餐廳門口非常開陽，長長嘅吧枱對正大草地同海景感覺非常舒適，另外仲有露天座位所以見到好多家長帶埋毛孩放風，內裏裝修非常有特色用咗好多唔同顏色同款式嘅傢俬，而且更有 free flow & fab 非常好。紫薯奶皇煎堆 ($88) : 荔枝造型賣相非常精緻，咬開爽脆嘅外層後，見到裏面有勁多奶皇汁，奶皇控必試。髮菜蠔豉羊肚菌燒賣 ($108) : 燒賣大大粒又彈牙非常有口感，三粒燒賣都各自配上唔同嘅食材，三款裏面自己最鍾意食蠔豉燒賣，貪佢味道夠香濃夠大隻。鮮蝦紅米腸 ($98) : 腸粉皮口感軟熟内裏非常脆口，完全做到外軟內脆嘅口感，而且蝦肉非常飽滿，鍾意食蝦嘅朋友咪錯過。另外叫咗杯 Prosecco 同 Chardonnay 望住個靚景 Chill 下。