Cafe Paradise (杏花邨) (已結業)

同朋友嚟到杏花邨，平日晏晝要搵嘢食，見到呢間裝修幾特別既餐廳，見到價錢又唔算太貴，就入咗去試試佢。餐廳係就可愛既主題樂園路線，好適合帶埋小朋友嚟呢度食。除咗每日既午餐之外，都仲有好多意粉或者意大利飯之類揀，drink menu好特別。我就叫咗個黑松露野菌意大利飯($73)，黑松露味好香濃，一嚟到就聞到，飯唔會太濕太乾啱啱好，亦都唔會太膩，可以食到晒成個。朋友叫既煙三文魚黑松露海蝦意大利寬條麵($83)，朋友俾咗小小我試下，我都覺得好好食，啲黑松露連海鮮食好好味。我地再叫咗個小食拼盤($68)，都幾多嘢食，有唔同造法既雞翼、炸薯角、炸薯條、腸仔等，呢個價錢嚟講份量都幾多，都好好味添。