鳴門魚市場居酒屋 (已結業)

細細間店面，喺西環半山嘅第一街。條街雖然比較靜，但係就有啲似喺日本街頭嘅感覺。成間餐廳都係和風嘅設計，有少少居家嘅感覺。我哋分別點左一份晚市一人前同埋一份夕食，另外仲有每日新鮮運到嘅飛機貨。「豐」一人前前菜有芥末八爪魚同埋中華沙律，另外附上味噌湯，湯入邊有昆布、菇菌、蘿蔔等等多種材料。三色刺身分別係牡丹蝦、油甘魚同三文魚腩，全部都非常新鮮，完全冇魚腥味。火炙帆立貝黑松露口感十足，黑松露嘅點綴令帆立貝更加滋味。網燒美國安格斯牛肉眼配柚子醬真係值得重點推介，因為份量絕對係超值，而且廚師非常細心切開一件件，生熟度剛剛好，唔會overcooked。迷你火炙鰻魚飯對女仔來講都唔迷你，鰻魚外脆內軟，而且醬汁完全冇蓋過魚味。今日嘅甜品係薄荷朱古力雪糕。夕食就點左北海道刺身丼，配料非常豐富，包括：拖羅、油甘魚、牡丹蝦、帆立貝、海膽、三文魚籽、三文魚腩，而且每種刺身都有兩件，鋪滿成個丼，真係啖啖刺身，啖啖咁滿足。另外餐廳每日都會有新鮮運到嘅飛機貨，今次我哋就點左油甘魚、金目鯛、赤貝同赤貝裙邊。油甘魚特別新鮮，金目鯛另外有輕輕火炙，有少少香烤嘅感覺。赤貝仲可以「一雞兩味」，赤貝裙邊做咗卷物，清新可口。餐廳