El Cerdo (大壩街) (已結業)

向荃灣廣場睇完戲，所以就向附近搵食，之前見過一間幾靚嘅餐廳，行過去睇下原來係一間西班牙餐廳，好少食西班牙菜，咁一於入去試下先。餐廳裝修好有格調，感覺好grand 。餐牌選擇唔算太多，但全部都好特別。餐廳而家做緊happy hour Sangria 買一送一, 當然叫返杯飲下啦！Red Sangria 果味香濃，好易入口！炸黑毛豬火腿球外層炸到金黃酥脆，內裏薯蓉軟滑，火腿咸香惹味，加上他他醬汁，可以減低油膩感，配酒一流！脆皮豬腩肉配蜂蜜蛋黃醬豬腩肉外皮脆卜卜，豬肉鮮嫩，蛋黃醬感覺似薯泥，仲好香甜。El Cerdo 招牌西班牙炒飯用上大量海鮮煮成，炒飯海鮮味香濃，魷魚爽口彈牙，蝦肉鮮甜，青口鮮嫩多汁，而且仲加上脆肉，材料真係好豐盛。餐廳環境高雅，有格調，真係好適合幾個好朋友把酒言歡，吹吹水。