影片
更多
2023-05-14
2189 瀏覽
有啲朋友原無乜點去過工廠大廈內嘅餐廳，所以，今次就專誠帶佢哋嚟到「i Kitchen」試試，點解揀呢間？其實無乜好特別原因，只喺因為呢間試過，知道質素去做咩，夠穩陣，此外，經過3年疫程都仍然撐得住嘅，必定有佢嘅實力，幫襯嘅信心自然又大啲。由於餐廳以酒吧餐廳做定位，所以，一入去左邊 就喺酒吧嘅格局，整體以黑白為主色調，顯得幾有型格，加裝唔少聚焦燈，營造出唔錯嘅氣氛。此外，中間闊落嘅走廊，使到空間感多咗。翻一翻餐牌，應該跟之前無咩太大分別，食物嘅分類都喺前菜、小食、湯品、意大利麵 / 意大利飯、薄餅、主菜、二人套餐、甜品及飲品，選擇依然多。另加$38可轉為套餐，仲有多種加配優惠。此外，晌門口仲棟咗個「美國斧頭扒4人套餐」，睇起嚟吸引架，不過，一來擔心我哋食唔晒，二來超過咗我哋嘅預算，所以，我哋都喺嗌番主菜，再轉套餐。香煎美式蟹肉餅伴香梨及田園沙律 $88唔知何謂美式，總之，就炸得金黃，入口堅喺啖啖蟹肉，好鮮味，蟹味濃郁，襯以清爽嘅香梨同沙律菜，減低少少罪惡感，只喺可惜一客只得一件，每人分得一啖仔，認真唔夠喉！白酒牛油加仁里煮紐西蘭半殼青口 $98另一個頭盤就揀紐西蘭青口，一客9隻，至少每人
由於餐廳以酒吧餐廳做定位，所以，一入去左邊 就喺酒吧嘅格局，整體以黑白為主色調，顯得幾有型格，加裝唔少聚焦燈，營造出唔錯嘅氣氛。此外，中間闊落嘅走廊，使到空間感多咗。
翻一翻餐牌，應該跟之前無咩太大分別，食物嘅分類都喺前菜、小食、湯品、意大利麵 / 意大利飯、薄餅、主菜、二人套餐、甜品及飲品，選擇依然多。另加$38可轉為套餐，仲有多種加配優惠。
此外，晌門口仲棟咗個「美國斧頭扒4人套餐」，睇起嚟吸引架，不過，一來擔心我哋食唔晒，二來超過咗我哋嘅預算，所以，我哋都喺嗌番主菜，再轉套餐。
香煎美式蟹肉餅伴香梨及田園沙律 $88唔知何謂美式，總之，就炸得金黃，入口堅喺啖啖蟹肉，好鮮味，蟹味濃郁，襯以清爽嘅香梨同沙律菜，減低少少罪惡感，只喺可惜一客只得一件，每人分得一啖仔，認真唔夠喉！
白酒牛油加仁里煮紐西蘭半殼青口 $98另一個頭盤就揀紐西蘭青口，一客9隻，至少每人都試到兩隻，啲青口肉好鮮嫩，唔會好似啲雪藏貨雪死晒，成嚿擦子膠咁韌，加上個白酒牛油汁煮得幾香，食味唔錯。
廚師餐湯（套餐）今晚嘅餐湯喺南瓜忌廉湯，一如過往，都喺伴以長長嘅意式麵包條，咬落好脆口，而個湯幾柔滑，不過，南瓜味唔算好強，反而有微微酸香味，似喺加咗蕃茄去打。
西班牙海鮮、辣肉腸、雞肉燉飯 $268呢道西班牙海鮮飯以正宗嘅小鑊盛上，份量之大足2-3人享用，飯面仲放咗好多海鮮，如虎蝦、帶子、青口、大蜆，上枱時店員更特別介紹唔單止採用西班牙米，更升級用上龍蝦湯去煮，唔怪之得啲飯粒入口濕潤，並充滿海鮮香味，而各種海鮮都鮮甜好味，整體真喺做得有水準。
西班牙海鮮、辣肉腸、雞肉燉飯
$268
22 瀏覽
0 讚好
0 留言
呢個意大利飯跟西班牙海鮮飯有啲相似，但食落去會明顯覺得有分別，雖然同樣喺濕濕潤潤，但入口飯粒比較煙韌，咬口感比較強。既然用上北海道刺身級嘅帶子，當然味道更加鮮甜，口感更加彈牙，唔喺雪藏貨可比，唯一挑剔位喺太少紅甜椒喇！
香煎美國黑豚肉眼扒、意大利黑醋醬 $168較為屬肉嘅主菜就睇啱呢款黑豚肉眼扒，成品上到枱賣相都幾靚仔，尤其啲蔬菜，經過少少雕刻，加埋色彩艷麗，而黑豚未食都覺得鬆化，因為切落去都已經感受到，再配上經處理過嘅黑醋醬，嗰份酸香特別醇厚，令到豚肉肉味突出。
即磨咖啡（套餐）因為會另外追加兩道甜品作結，所以，餐飲揀左即磨咖啡，杯咖啡一上枱已經聞到好醇香嘅咖啡味，飲落真喺幾唔錯，配甜品永遠喺最好嘅拍檔。
基本嘅服務已經算做到足，不時主動添水、收碟，此外，當我哋準備食甜品時，更會幫我哋換過晒新一套餐具，侍應嘅態度亦都好有禮貌。
自家製焦糖蘋果批伴雲呢嗱雪糕 $68呢款甜品之前曾試過，所以，都想推介俾朋友試試。批殼以酥皮做，甘香酥脆，內裡填滿蘋果粒，果肉清鮮軟熟，味道滲有少少焦糖香，伴以雲呢嗱雪糕，一熱一凍，食得夠爽。如果俾多少少玉桂就更啱我心水。
意大利芝士餅 $58都好一段時間無食過意大利芝士餅，從外觀看，做得唔錯，蛋糕層都算沾滿咖啡酒，中間嘅馬卡風芝士淡雅清香，不過，似乎存放上有啲雪過籠，口感有啲冰感，失去咗應有嘅軟滑度。
今餐都算食得好豐富，對於環境、服務、食物質素，朋友都覺得好滿意，加上喺廠廈餐廳，有少少秘竇之感，自然又加多啲分落去。
張貼
