TORIO喫茶部 (已結業)

觀塘呢個地方真係令人又愛又恨, 雖然返工放工十分之多人, 不過實在有好多好靚嘅餐廳可以食飯。喺街邊抬頭向上望, 就見到呢間舖頭喇, 所以決定上去睇吓。一推開門就覺得環境好靚, 比人一種日式嘅感覺。如果鍾意打卡的話🤳🏼, 呢間餐廳有好多地方都可以影相。座位闊落同舒適, 而包廂嘅座位就好特別。🍴Torio 招牌之青蘋紅茶咖哩飯(吉列豬扒)非常豐富, 除咗咖哩飯同吉列豬扒, 仲配有沙律, 薯蓉同哈蜜瓜。吉列豬扒好鬆脆, 唔會乾爭爭。咖哩係日式甜咖哩, 送飯真係好好食。🍴傳統黑松露巴馬火腿野菌意大利麵黑松露同巴馬火腿嘅味道都幾夾, 大家都唔會蓋過對方嘅味道, 望落去份量唔多, 不過可能因為係黑松露汁, 所以食吓食吓都幾飽肚。🍴糖漬橙柳紅茶 & 糖漬蘋果綠茶飲品隨Lunch set 附送, 本來見到糖漬呢2個字係有d 擔心會好甜, 不過好彩係自己諗多咗。橙柳紅茶好香橙味, 蘋果綠茶就係淡淡嘅綠茶。整體服務, 食品飲品都好好, 值得再去嘅地方。