阿桂老友粉 (已結業)

尋日同老公落觀塘行街，正正下午茶時份，肚仔餓當然要搵野食啦﹗今次經過康寧道，被一間裝修好pink的餐廳阿桂老友粉所吸引，於是好奇孖寶當然就係要入去試試啦﹗入到去餐廳全黑配shocking pink的裝潢令我覺得好型格又可愛﹗而且座位又寬敞又舒服。好明顯老闆係一個好鍾意靚的人，連本餐牌都設計得好靚。原來老友粉都有故事，而且仲好感人架，所以我真係好想試下老友粉係點嘅味道。未食野之前飲左一枝山渣蘋果茶，酸酸甜甜好開胃啊﹗ 大大枝只售hk$10主角老友粉終於出現啦﹗顏色好似馬來沙嗲咁，裡面好多料，有生菜、蕃茄、豬肉同埋花生粒。湯底好鮮甜，而且帶有少少酸，好開胃，味道又夠特別。入面麵底係蓮藕粉，蓮藕粉係透明架﹗口感好爽好彈牙，我好鍾意呀﹗老公就點左小辣擔擔麵，個湯底勁香呀﹗而且勁多肉碎，又有花生粒，正呀﹗擔擔麵比平日食的擔擔麵粗身，而且都係好爽口彈牙﹗老公食到好滿足，仲大讚添。另外，我地仲點左佢地出名嘅惹味口水雞。雞肉好嫩滑，而且好入味，不過份量唔算多，只係岩岩夠兩人食。