新匯聚打冷小廚 (已結業)

去到觀塘地鐵站附近，口痕痕想打個冷，就揀咗呢間食。門口有啲難搵，差啲睇唔到，佢係＂高興＂附近，如果我搵唔到，就會行咗入去高興🤣入到去都好大好通氣，不過就冷氣唔多夠。除咗側邊既卡位，中間都係啲大大小小既圓枱，甚有大排檔feel。先嚟一碟鵝片，鵝肉唔夠香滑，不過個鹵水汁就幾好味。成碟都係得面頭嗰16塊，而底下嘅豆腐冇變味完全食得番晒（我試過其他地方有變壞）跟住落嚟就係炸蠔餅，由於炸粉太多，令到每一啖都食唔到蠔，不過炸粉炸得幾脆唔會一口油。算啦，都要比人賺下。另外牛筋腩唔錯，牛肉味道夠香，忟得夠冧，而湯底有啲似豬肚湯味，而九肚魚就大條細碟，脆卜卜啱送酒。最後嗰胃爭少少，叫左碟梅子骨，甜酸味好濃，不過就食唔出咩梅味。其實如果爭少少唔夠飽，呢間野有簡單中式糖水叫，不過我就無試過，又唔係好見其他食客叫。