OneThird (已結業)

放假，又同狗狗搵嘢食喇！！今日天氣麻麻，到咗附近已經開始落毛毛雨，於是就揀咗呢間喺正馬路邊，比較就腳的cafe~Cafe室外空間幾大，夠開揚，放咗簡單檯櫈。我坐的係木櫈，唔算舒服，好難坐得耐，如果唔係帶住狗狗，坐cafe入面應該會寫意啲。點咗一個cake set，香蕉蛋糕跟咖啡，咖啡可選黑/白咖啡，或者補錢點其他，而我就加錢點咗Dirty，總數$70。先上香蕉蛋糕。蛋糕賣相簡單、樸實，雖然冇乜香蕉味，但係都好鬆軟。Dirty上檯時已冇明顯的2層，入口時溫度已經調和咗，少咗一熱一冷的衝擊。我對Dirty冇乜研究，但當初喜歡呢款咖啡係因為先熱後冷好特別，飲下飲下又再混成一杯微冷的咖啡，覺得好得意。不過，呢度的Dirty就少咗呢種味覺上的溫差體驗，所以有啲失望。咖啡裡面的咖啡因應該都幾重，飲緊同飲完後幾個鐘我都覺得醒神。Café可以一試，但不試亦無妨。由於餐廳開頭送錯咗飲品，所以我亦試咗兩啖凍朱古力，呢度的凍朱古力反而幾唔錯，唔甜，可可味又濃。由於都係雲石紋賣相，我仲以為係Dirty變奏版添。