麵留香

營業中

休息中

今晚黎到呢度附近食飯，見呢間餐廳好似好多人咁就入去試下啦。一入門口見到個老闆非常熟口面，原來係之前樓下許榮記個老闆個女，佢地而家過左黎呢邊開舖，仲話整魚蛋個個師傅係許榮記之前個老闆教架添，應該唔會太差掛。既然佢魚蛋出名，當然要叫啦，叫左個魚蛋片頭河，唔跟餐$18。另外就叫左個飯餐，要咸魚蒸肉餅，有飯同湯跟既。大部分客人黎到都係叫魚蛋河，睇黎大家都知呢樣野出名d喎。魚蛋粉比較快就黎到啦，不過份量比以前好似少左喎，魚蛋真係幾好，好彈牙而且又有魚味，而我就覺得片頭都唔錯既，可能我本身幾鍾意佢個種口感啦，不過同以前既許榮記比都仲係差少少。雖然魚蛋片頭都ok，不過佢既湯底真係淡到不得了，係真係無咩味，搞到我地要落返D魚露至得。另外咸蛋蒸肉餅就等左比較耐既時間啦，呢個都係普普通通，唔係特別好食。可能佢用D豬肉無咁靚，所以食落味道都係淡D無咩味，而且感覺較「鞋」口，一D都唔滑，味道係唔難食既，但要細緻研究就真係麻麻地啦。呢度質素普通，買下佢D魚蛋片頭都可以既，不過價錢唔算太貴，如果第日想食魚蛋飯都可以過黎呢度食下。