麥當勞

營業中

休息中

天氣咁凍，最好當然係飲杯熱飲，一碗熱湯啦！呢個老麥嘅薯餅牛堡套餐，加個小龍蝦湯，唔知啱唔啱你？套餐包括「黃金脆薯牛堡」，增大裝扭扭薯條，熱檸檬茶。個名就寫得好鬼靚，黃金脆薯牛堡，但只不過係一塊炸薯餅，而且一啲都唔脆，加塊長身漢堡牛肉，淋啲黑椒汁落去，兩者味道根本就唔夾，食唔到薯餅應有嘅特色味道，所有味都畀黑椒汁搶曬，我只係食到黑椒汁嘅辣味，其他乜嘢味都無。扭扭薯條個味我喜歡，係以前嗰隻燒烤味，如果早前出嘅薯格都係呢隻味嘅話，你話幾好呢！可惜佢唔係。檸檬茶，我覺得係老麥熱飲中唯一最好飲嘅飲品，沒有之二。檸檬唔苦，又有茶味。小龍蝦湯就絕對令我失望，咁嘅天氣，推出湯類飲品，自然期望係熱湯啦！但嚟到嘅時候，居然只係少少暖，同熱有好大段距離，我估應該係少人叫，所以無再加熱，蝦肉有三隻，叫做聊勝於無。埋單計，呢個餐扣減手機程式優惠後，實付$59.5，你認為值唔值？我就覺得抱住好奇心試一試，還可接受，但試過一次，知道味道就已經足夠。