Pan House (已結業)

一間響大路邊但又好容易行過都唔知美味外賣小店。經過貪得意買個牛肉芝士飽($18)，價錢比一般貴。就算唔同老麥比都比附近時新貴幾多，所以要有番D要求。個飽係即叫即做，牛肉係將一個牛肉球再煎成漢堡扒狀，將近完成時再加D秘製醬汁、蕃茄、生菜，連個飽都番熱過，熱辣辣時好好食，但如果拎番屋企攤凍可能就大打折扣。如果要同時新比，用料方面係勝一籌，因為得新只係用一般漢堡扒，但醬汁方面個人就鍾意得新多D。雖然係貴D但成個製作過程要10分鐘，每個細節都一絲不苟，淨係呢點誠意都值回票價。