JK Kitchen (已結業)

其實同男朋友成日都去銅鑼灣食晚飯，次次都係食我地食慣既米線，今次試下食啲樓上鋪頭先。我地係登龍街咁多食市中揀左JK Kitchen黎試，都好耐無食過越式野lu。出面同裡面既裝修都好靚，感覺好乾淨。入到去，加分位係有個大電視🤓第一道餸係越式豬扒飯，賣相好野味，豬扒配炸蒜同葱真係無敵既組合，豬扒唔林唔硬，少脂肪得黎唔乾，啲白飯都好好味，perfect！第二道係越式春卷河粉，分左三碟咁咁上，好鐘意佢張青檸，辣椒，芽菜分開上，真係幾貼心，可以鍾意攞幾多就攞幾多，男朋友唔鍾意食芽菜就冇落過🧐春卷炸得好脆，食落又唔係好油，同埋好大條好足料呀！第三道菜係越式雞肉串燒，雞肉調味得幾好，好似唔洗點醬都好有味。甜品黎啦，呢杯係三色啫喱呀！真係有三隻包好有誠意，上面仲有椰果食，勁好味！到飲品啦，我覺得係今晚既重點，真係無嗌錯，就係越式三色冰啦！呢杯真係無敵大杯，由最底講起，有爽口既浪粉，之後有巨大既椰子冰，睇落好似一座雪山咁，最上有勁多紅豆，真係好正好抵飲！另一杯就係清浪既椰子水。整體黎講，上菜快，服務好，環境好，味道好，應該會再黎食。