誠拉麵 (已結業)

最近疫情嚴重，好耐都冇得去旅行，所以都好掛住日本啲嘢食，唯有就食下日本餐廳，一解思鄉之情。今次嚟到呢間「誠拉麵」係朋友推介嘅，佢個套餐都幾抵食，唔使100蚊就有麵、沙律、同手羽，日本餐廳嚟講，性價比都好高。一入門口，發現裝修都幾有日本風格，以美食廣場嘅餐廳嚟講，算係超曬班。另外食材方面、見到佢有特別標註用日本嘅雞蛋，咁就可以食得更加放心啦。一碗拉麵嘅靈魂係在於湯底，呢間餐廳嘅湯底非常濃厚，雖然比唔上一啲幾百蚊嘅餐廳，但呢個價位嚟講算係冇得挑剔。麵質都食得出係幾彈牙，挑選材料方面呢都幾用心嘅。另外，佢比起日本好多餐廳都好足料，食完成個套餐飽足感係非常之高，唔會話食完要再去搵其他嘢食咁，總括嚟講都算幾滿意。