豊勝手丼 (已結業)

落到銅鑼灣好多餐廳都關門，見到呢間位於地下嘅豊勝手丼就試吓，堂食有8折。午市定食有19款，有生有熟食，附送沙律，前菜同吸物。最平定食$98，最貴$348，另加一。附送沙律係沙律雜菜同車厘茄半粒，加左足夠柚子醋。前菜係中華沙律。味噌湯有少少豆腐粒同昆布，味道夠鹹。等左都幾耐先有丼飯，店員忙住做外賣。五品貝之風呂丼 $348 另加一呢個丼係全餐牌最貴，有海膽兩大片，連殼磯煮鮑魚一隻，活赤貝一隻，帆立貝一細隻，同馬刀貝幾片。啲材料唔夠蓋住啲飯。日式芥末同酸薑份量就勁多。海膽大大片，食落少少苦，絕對低質。其他海鮮質素正常，冇乜特別，呢個價錢分量偏少。酸薑好辣。炙之海鮮丼 $268 另加一炙之海鮮丼有炙燒三文魚三片，吞拿魚同油甘魚各兩片，同帶子一隻。啲海鮮完全冇炙燒味，冇油香又乾爭爭，差。材料都係分量偏少。餐廳寫明壽司飯可免費添加。見啲壽司飯上左豉油色不過冇乜味，又唔夠酸，又偏硬，幾難食。我同行友人要添飯先可食飽。跟餐可加$20追加小食，或加$30加刺身。裝修好日式，都算見得人，不過非常擠迫。總結，價錢非常貴而質素差，絕對無下次。