喜來稀肉 (瓊華中心)

營業中

休息中

一直想食喜來稀肉好耐，今日終於約到閨蜜陪我食。餐廳入面環境都唔錯，空間感十足，每枱都有獨立抽油煙機，唔怕食到一身油煙味。門外張貼咗告示，係講如何免費享用沙律吧嘅方法，都幾搞笑。所講嘅沙律吧其實係韓式泡菜沙律。既然任食，而且泡菜又有益，即刻夾一大盤返番埋位慢慢品嚐。最鍾意食韓燒烤爐邊嘅雞蛋，呢度預設咗純雞蛋同芝士雞蛋，店員仲建議我哋可以自己加泡菜落去變泡菜蛋。最鍾意佢無限追加，我哋都refill咗幾次。朋友話唔想食太多肉，最後決定叫濟州五花肉，係兩大條五花腩。五花肉燒起上嚟味道更甘香，而且經過燒烤後嘅五花肉可以去除多餘油脂，食起上嚟卜卜脆。除咗燒肉，我哋仲叫咗幾款主食，海鮮泡菜餅鋪滿一隻大圓碟，入面有好豐富嘅海鮮，而且味道都唔錯，點埋佢嘅秘製醬汁就更好味。牛排骨湯上枱嘅時候熱辣辣。牛排骨份量相當多，入面仲有大葱同粉絲，湯底帶有胡椒香，都幾醒胃。最後食埋個甜品，韓式雪花冰Bingsu係牛奶味嘅棉花冰，上面就灑上黃豆粉、穀物片、花生、麻糬粒、紅豆蓉等，無論賣相同味道都攞滿分，下次再嚟一定要encore。