一糖 (屏山)

營業中

休息中

自從天水圍開咗一糖，終於唔洗落元朗都有甜品食🤪🤪特別係近期呢種時不時落雨嘅日子，出去食嘢更加注重就唔就腳。記得初開業嘅時候只有室內廖廖幾枱座位，依家擴充到室外車場範圍，輪候時間大大刪減；加上有瓦遮頭同風扇，唔洗等位又唔怕熱同淋雨。甜品種類多到成本相簿咁厚，中式、西式、特飲、時令水果、綿綿冰，基本上你諗到嘅都有。私心推薦椰皇燉蛋白❣️蛋白椰汁各佔一半，比純燉奶入口輕盈不膩，甜度適中、唔死甜；加上啖啖桃膠，滋潤又養顏，啱哂女仔飲～椰殼上嘅椰子肉一刮就甩，真係可以食哂啲果肉🤟🏻日式芭菲雖然無日本正宗嘅多料，但雪糕、脆米、紅豆、忌廉同啫喱幾種不同口感層次嘅食材同樣帶嚟充分滿足✨抹茶味偏淡香不甘澀，抹茶控可能會覺得唔夠濃郁。心太軟有多種口味選擇，身為酒鬼當然係揀Bailey’s🙉但食落無咩酒味。心太軟即叫即製，火候恰到好處外脆內軟，配上面頭帶淡奶油香嘅輕忌廉，感覺比起配雪糕更合適；選用咗偏濃嘅苦甜朱古力，食落唔會太甜漏。窩夫中規中矩，可能擺碟耐咗嘅關係，上枱微溫、唔夠香脆；除咗加入砂糖煮過嘅蘋果粒，仲有幾片爽脆嘅蘋果薄片同粟米片提升口感，都算幾有心思。