Eggspectation (已結業)

好耐之前成日喺雜誌、電視見到呢間新派雞蛋仔嘅介紹，一直都好想試。每次偶爾經過呢度，佢都冇開舖，仲懷疑佢執咗。嗰個周末去探朋友，終於撞到佢開門喇。我其實食完晏無耐，嘻嘻～試新野喎，始終都有多個胃嘅。睇到牆上貼住嘅選擇……嘩！款款都好似好好味，我嘅選擇困難症發作喇。最後見到呢一個poster ,就佢啦，揀咗檸薑味。佢哋係即叫即整，等左一陣終於有得食啦！個包裝都幾吸引，係一個通窿嘅硬紙盒。雞蛋仔每粒嘅size比傳統嘅細啲，介乎五毫至一蚊銀啦。外層夠熱，但唔算勁脆。正如佢哋鋪頭所講只係加牛奶唔加水，食落又真係多咗牛奶香味。每粒雞蛋仔入邊都有一小粒檸汁薑，薑唔係好辣，少少甜，少少鹹。口味都幾過癮。呢個雞蛋仔實在好啱貪新鮮嘅人，可惜我未能忘舊。如果只係俾我二揀一，我都係會掛住某啲屋邨入邊嘅炭燒雞蛋仔多d。咁樣比較可能未必好公平，始終呢度嘅口味既創新又獨特。老闆敢於開拓新口味嘅勇氣值得一讚嘅！間鋪頭外面仲放左一張小圓枱同兩張櫈。原來佢哋唔單只有雞蛋仔賣，仲有英式早餐、漢堡包餐等等。價錢算ok,$50-60問咗佢哋開舖時間，係每日晏晝兩點半至晚上大概七點。逢禮拜五休息架，下次我唔會再摸門釘。