Bougel Cafe & Bakery

營業中

休息中

屯門其實唔係本蟲嘅活躍範圍，今次專誠入嚟試𠵱間餐廳。首先要讚嘅係服務，儘管鋪面唔大，但店員見我一個人入去攞七個人嘅枱都冇拒絕我，仲主動幫我拍枱安排。而同行中既有小朋友亦有人生日，餐廳不但有小童餐具同配上生日字句喺蛋糕上，仲特別播放埋生日歌同有精美伴碟圖案。店員既有細心介紹唔同類型食品，飲品仲有好靚嘅拉花。食物方面主要分麵包類同輕食類，麵包由牛角包、鬆餅以至各種特色嘅包都包羅萬有，本蟲尤其喜歡開心果味。輕食類則由意粉、沙律到蛋糕都一應俱全，其中特別欣賞佢哋嘅柚子味芝士蛋糕。飲品方面拉花非常精美，果汁亦好喝，唯一需要改善嘅係茶類飲品，由於茶味唔夠濃，如果凍飲再加上冰會更加淡口，因此檸茶奶茶都唔太建議。環境方面餐廳好善用空間，店外有一個精緻嘅等候區，店旁外牆另設簡便嘅獨立座位可供顧客倚牆稍歇。室內佈置同麵包櫃嘅裝飾皆美侖美奐，令人感覺舒適。