misocool (已結業)

所謂辛苦揾嚟志在食，今日同朋友收工去咗鰂魚涌呢間Misocool食返餐好嘢，我地一行兩人入到去點咗個Omakase 2人盛宴試下 前菜係三文魚蟹籽沙律，雖然主打係沙律，但其他配菜一啲都唔求其，而三文魚同蟹籽粉量都好多，三文魚厚切大大粒，蟹籽都有一大堆，食落啖啖都係精華。 壽司拼盤即叫即整，有三文魚腩、活魚同玉子燒，壽司上面既刺身大大塊，差啲見唔到有飯咁滯，且用料新鮮，名符其實抵食夾大件。 飲品我地就揀咗荔枝水果茶同埋香檳葡萄雪冰，兩杯飲品望落都已經好似藝術品咁靚，真係有少少唔捨得飲佢哋落肚，但飲落又覺得好清新，絕對適合如此炎夏。另外，炸雞翼、餃子都整得好好食，外面香脆，內裏juicy，而野生海鮮鍋用料夠晒新鮮之餘亦好足料，基本上成個鍋都鋪滿晒新鮮海產，誠意十足。甜品我地就揀咗奶凍，奶味濃郁加上入口即溶，軟綿綿口感加上冰凍質感，好味﹗ 呢間餐廳雖然位置偏僻，但食物質素真係唔錯，值得推介﹗