Little Mermaid Bakery

營業中

休息中

今日去咗沙田行街，食完午餐，跟住就過咗嚟city’super行一陣，當消化下。跟住突然間見到有間包舖，門口擺咗好多一條條嘅麵包狀的東西，顏色都係啡色，閃閃令，非常之吸引，行咗過去睇。原來呢啲係丹麥條嚟，我未食過。佢真係烤得好靚，佢個外層係閃令閃令咁，烤得好好，感覺好脆，我啱啱食飽飯，都忍唔住問個朋友，要唔要試吓。朋友都話好想試，覺得好靚。佢嘅口味真係非常非常之多，完全唔識揀。跟住見到有D24榴槤味，都完全唔想揀其他，呢個時間有榴槤味嘅食物，超想試！朋友就揀咗脆糖丹麥條。超好運，榴槤味嘅丹麥條係啱啱新鮮出爐，因為侍應同我講要睇熱，嗰陣時我已經滿心歡喜，熱辣辣出爐嘅，最開心！咬一啖，超級好食!!! 入面質感似年糕加麻糬, 唔係exactly 榴槤肉, 好香, 好香!超後悔冇影入面係點，因為我食得超快。朋友食緊頭兩啖嗰陣，我已經食晒成條，跟住佢問我你食晒啦？我話係呀，因為真係好好食！我好想買第二條食！朋友話佢嗰條味道都唔錯，不過就唔夠熱，如果熱啲應該會更香！呢間嘢我要留意吓，下次經過我都要再來試先，因為真係好好味呀！