榮少喇沙 (已結業)

要講屯門嘅美食真係點試都試唔曬，今次經朋友介紹嚟咗屯門呢間榮少喇沙。為咗試佢哋更多嘅餸，珍寶喇沙就啱晒，有齊豬軟骨、龍蝦丸、肥牛、魚片、魚蛋、墨魚丸、豆卜同雞蛋。湯底除咗喇沙湯底，係可以揀芫茜魚湯同魚湯嘅，我建議第一次食當然係揀招牌喇沙湯底，麵底方面竟然有雙拼可以選擇，我就叫左油麵加米粉，湯底椰香濃郁色水十足，飲一啖完全係開曬胃，餸料麵料份量十足，豆卜吸曬啲濃湯十分juicy，整體嚟講十分高質！另外我哋仲嗌咗小食拼盤，呢個完全係十分驚喜！新鮮炸起即刻上碟嘅雞翼、越南春卷同蝦餅，越南春卷係我呢一味嘅最愛，入面有一片香葉令味道提升，連蝦尾都係炸到脆卜卜！雞翼亦係水準以上，完全鎖住所有肉汁。整體來講絕對係難以置信性價比高嘅一餐，鍾意喇沙嘅絕對要試！