怒茶巷 (已結業)

周不時都會約朋友行葵廣，睇吓衫同掃下街，咁就係一個愉快嘅day off啦~ 有行開葵廣嘅都知，3樓有一條食街，咁岩今日都行過，但係大部份響嗰度食店我哋都試過晒，但朋友好眼利，發現咗呢間要轉入少少嘅飲品店位置一啲都唔起眼，但見未試過, 就一於望吓個Menu啦~ 一見到黑糖珍珠鮮奶$25一杯! 我就二話不說買咗，因為而家出面閒閒地都賣$30+一杯，雖然鍾意但我成日都唔捨得飲，見佢$25咁抵就嗱嗱臨買返杯試吓! 最正嘅係呢度仲有得揀少甜少冰，出面好多都固定咗甜度~ 朋友好鍾意芝士奶蓋，所以就叫咗杯芝士四季春茶走甜少冰~ 黑糖珍珠鮮奶令我好驚喜奶味好香，珍珠香甜，軟硬度啱啱好，杯嘢飲拎上手嗰陣，珍珠仲係少少燙手，鮮奶就凍冰冰，撞埋一齊好正! 咁嘅價錢完全係超水準發揮至於芝士四季春茶都好好飲, 茶味濃郁微甘，芝士奶蓋香滑唔會太漏，呢個價錢同呢個質素，建議大家嚟到葵廣都一定要試吓