淘園火鍋館

營業中

休息中

今日行完山，想食返餐勁嘅嚟補充番今日燃燒左嘅卡路里。我哋嗌左半隻雞嘅雞煲，佢呢度個雞煲係會煮好咗，但唔會再繼續加熱。確保啲雞真係最滑最好食，而最重要嘅係佢真係炒得好香，你所有嘅配料都已經入晒味林晒，唔使再煮。真係好食到爭住食呀！食完隻雞之後就會幫你加湯，俾你打邊爐。我哋嗌左個鳳城水餃，真係完全估唔到佢係咁大粒同埋有成八隻咁多，而佢每一隻水餃入邊都有兩隻蝦，最重要係全部都新鮮彈牙，真係全部真材實料，好足料。然後我哋仲嗌咗個四寶丸，分別係鯪魚，墨魚，蝦同芝士牛丸。我自己覺得最好食係墨魚丸，因為真係超級彈牙。不過其實佢嘅鯪魚同埋蝦丸都超級彈牙爽口。而特別嘅係佢個芝士牛丸，除咗個牛丸好彈牙之外中間係有芝士嘅，都好好食。另外我哋仲嗌咗個豬紅，佢個豬紅都份量好多，而且唔會一夾就散，煮到最後都真係幾好食㗎。另外仲帶咗蘿蔔同埋萵筍，呢兩樣野都好新鮮冇渣。而最好食嘅係個冬瓜，除咗新鮮冇渣之外，索晒啲湯真係好好食。而最驚喜嘅係佢個山根，出邊一般得四五粒，但呢度真係好大碟。最後仲嗌咗個白菜仔，都係索湯一流。樣樣都咁大碟，真係食到捧住個肚走，所以我覺得呢個價錢都合理嘅。