魚味市場居酒屋 (已結業)

居酒屋一向係我約朋友吹水嘅首選，今次同朋友試下呢間係西環嘅居酒屋飲勝同食晚飯。一入去，眼見鋪面雖小、裝修簡單，但係幾和風，一貫日本傳統居酒屋風格，幾有家庭feel同幾warm。首先點左一個晚市套餐share—串燒拼盤，total有八款唔同嘅特色串燒同附送一瓶燒酒（可加熱）/飲料，我揀左熱燒酒。八款串燒都好好食，燒得啱啱好，外面又香又脆，但裡面仍然好juicy。最欣賞係牛舌，好爽口，配上燒酒一流！本身中意食明太子嘅我都知佢同蛋係好朋友，見到明太子玉子燒就梗係要試下啦喂。呢個玉子燒同樣都冇令我失望！蛋好嫩滑，咬嘅時候仲有啲蛋汁，加上鹹鮮嘅明太子，真係停唔到口。清酒煮蜆都唔錯，一啲沙都冇，蜆肉亦都唔老，調味好出色，清淡嘅酒香並冇搶左蜆嘅味道，反而令到呢道菜更鮮。之後黎到嘅吞拿魚腩同三文魚腩刺身未食都已經想俾讚。兩款魚腩色澤紋路分布均勻，肉厚肥嫩。一食，果然係入口即溶，齒頰留香。最後唔夠飽仲追加左海膽炒飯，燒三文魚頭，燒雞泡魚乾，全部都很有水準。總體黎講，雖然呢間居酒屋嘅食物唔算平，但位於西環，食物質素又比得上唔少日本當地中上檔嘅餐廳。正所謂一分錢一分貨，呢個價錢食到咁高汁嘅嘢真係好唔錯。