華星客棧 (已結業)

一向都有食開華星嘅茶餐廳，覺得佢哋啲食物有水準員工效率又高。今次嚟到華星客棧，知道六點後有可以叫小菜食，所以決定要黎試吓。當日係星期六晚上大約六點半打電話去問吓有冇位。阿姐話其實已經全場爆滿，不過八點半打後都可以黎試吓。好彩去到啱啱有張枱埋單，大約等左5分鐘就可以入座。裝修尚算有懷舊感覺，比茶餐廳靚少少，有卡位及有大枱。不過比較嘈一啲，客人同客人都坐得比較近。梅菜蒸肉餅係每一次都要嗌幾份先夠，肉餅鬆軟彈牙，肉質鮮甜又滑，梅菜唔會太鹹，仲有帶少少甜味，真係好正好好食！本身自己係唔食羊肉嘅，但係當呢個羊腩煲滾起嘅時候，實在太香啦，諗返起以前細細個食嘅羊腩煲一模一樣。羊肉一啲蘇味都無，食完個身䁔粒粒！啲腐竹索晒羊肉嘅精華，加埋香濃嘅冬菇味簡直係絕配！一睇呢張相就知道有水準啦！標準嘅顏色，雞皮炸到又香又脆，啲肉又滑仲可以保留肉裏面嘅水份，唯一失色嘅地方係雞髀位最厚嗰舊肉仲有少少血水，不過冇辦法啦，唯有小心啲食。牛仔骨煲味道香濃適中，牛仔骨啲肉都算幾爽，唔會咬到牙都甩，個煲底仲有啲薯仔索晒啲汁，唯一失色嘅地方係食到最尾覺得有啲油。總結：員工態度積極親切，如果星期日冇飯開一定會來再食