牧羊少年咖啡館 (香港單車館)

營業中

休息中

之前嚟過香港單車館嘅牧羊少年咖啡館，座位好闊落，而且環境好舒服，好彩早年結業之後而家重開，又多個聚餐落腳嘅地方。二人餐好抵食，可以自選前菜、意粉、主菜、飲品，最後仲有Häagen-Dazs雪糕添！前菜方面揀咗炙燒荷蘭汁豬肉排，份量非常之多，就好似主食咁多，肉質一啲都唔柴，肥瘦平均。意粉方面揀咗避風塘炒蟹肉意大利粉，味道方面有少少辣辣地，有晒避風塘嘅惹味，加埋蟹肉，成個配搭好夾，十分推介！主食方面揀咗咖啡羊架 伴露絲瑪利燒汁，羊架有三舊，唔會燒得好乾，羊脂充斥喺個口腔度，配菜有燒蘆筍同埋燒日本南瓜，材料新鮮得來又可以解膩。飲品方面，牛奶可可朱古力非常濃郁，有杰杰地嘅口感；旭日就係紅蘿蔔、香橙同埋蘋果鮮製而成嘅果汁，一啲都唔會太甜，確實係健康之選。最後食埋曲奇味嘅Haagen-Dazs 雪糕就為今餐做完美嘅作結。