蝦棧 (已搬遷) 新店位置

今晚同朋友慶祝生日，搵左間專門吃蝦嘅餐廳吃佢至愛嘅蝦蝦蝦。蝦棧，就等我地試下佢有幾棧先！一入門口，就見到個水缸，嘩! 好多蝦，好生猛呀! 唔好意思我地要食你喇!一坐底，就有驚喜喎。老闆送左碟小食比我地，餐前小食，一般都係凍冰冰，但係呢碟係熱辣辣，新鮮炸起嘅一口紫薯酥細細粒，外面脆，裡面煙煙靱靱，唔錯嘅前菜！一路食一路點餐！麻辣雲耳小麻辣，麻味夠香，雲耳爽脆，個麻味好特別好驚喜!一口炸豆腐見隔離幾枱都食緊，咁就梗係試下啦，外層脆卜卜，中間keep到夠滑！本身炸豆腐調味較淡，個人比較鍾意食鹹，嘗試唔點汁，加少少鹽，好香口跟埋個甜醬汁，味道好夾喎！醉雞卷呢個必食，酒味香濃，啖啖肉，中間夾雜少少軟骨,好有啖口，食一碟係唔夠喉! 羽衣甘藍做沙律就食得多，蒜炒原來都係唔錯嘅選擇蝦主打嘅蝦，有成10款，最後投票揀左鹹蛋黃丶避風塘。鹹蛋黃個汁，加埋D蝦膏好邪惡，但又真係同個蝦好夾喎。D汁同蛋黃仲可以撈飯食，好邪惡，好好味呀！避風塘蝦就濕左少少，無想像咁香口，味道唔錯，如果可以乾身啲就不得了喇！今晚餐飯實在太豐富喇，我地食到Lam Lam 脷，朋友都話好滿意！明天又要努力做運動喇！