御品·千之味 (大全街) (已結業)

每次中午想食日本野都會諗起依間餐廳，佢嘅餐牌選擇多，魚生飯、烏冬或者熟食都有。最平嘅餐$40就有交易，本身已經包飲品。然後再加$28可以升級多個沙律、螺肉、小食。覺得升級幾抵食所以每次嚟基本上都會加錢，多啲野食成個set咁開心啲。而小食可以五選一，其中有一個係組合係餃子、辣味雞翼(各兩件)，亦都係我成日揀嘅款式。我都幾中意食依個照燒雞排定食，雖然係最平但分量十足，cp值夠高。點餐係掃QR Code，所以都幾方便，而且落完單野食都好快送到。因為野食分量真係頗多，我通常都會揀少飯，食完都已經覺得好夠飽。雞排外皮脆肉夠嫩滑，食落唔會乾柴，夾埋照燒汁好送飯。因為之前好多時喺其他地方食照燒雞排都會覺得overcook，所以個人覺得幾滿意依間餐廳嘅雞排，而且佢次次都可以keep到依個水準，唔錯幾好食。而其他食物味道正正常常，保持一貫水準，$68有咁多野食我覺得幾抵食，每次都食到非常滿足。再加上又係黃店，所以都會經常嚟幫襯。