九重鮮 (已結業)

冇諗過而家韓式蒸海鮮店會有咁多嘢食，仲有韓服體驗添！今日來到黃埔探朋友，朋友唔想煮飯，於是我哋就落咗樓下嘅九重鮮食九層塔蒸海鮮，好豐富呀！除咗蒸海鮮，仲有自助吧任食，食到我哋兩個攬住個肚啊！我哋揀咗升級濟州島10重海鮮塔，個餐仲配埋韓式自助吧飲食，位位都係三百幾蚊，有齊龍蝦鮑魚等等嘅海鮮，其實都幾抵食。個餐有非常多海鮮，包括龍蝦、鮑魚、海蝦、黑椒肥牛、龍躉、象拔蚌、大花蛤、沙白、超大粒日本元貝、蔬菜。樣樣嘢都新鮮好味，由於係蒸，可以食得出海鮮嘅鮮味。其中龍蝦啖啖肉，日本元貝超大粒，真係好耐冇食過咁大粒嘅元貝，象拔蚌大花蛤沙白都多肉冇沙，龍躉又厚又多肉，呢個10重海鮮塔真係冇得頂。至於佢哋嘅韓國自助吧食物都好豐富，有沙律、冷盤、冷麵、粉絲、韓國年糕、韓國魚蛋串、仲有好多款甜品，簡直係花多眼亂，樣樣都想試。而且餐廳仲會定時定候提供一些特別嘅食品，例如醬油蝦醬油鮑魚、韓國炸雞、芝士蛋餅，所以喺呢度食飯冇可能係食唔飽，問題係你食得到幾多。其中我覺得醬油蝦同醬油鮑魚、炸雞都好好食，甜品都好唔錯。咁嘅價錢有咁多食物咁多海鮮，簡直超值啦。