成都老碼頭火鍋 (已結業)

今日同老公去旺角行街見到老馬頭火鍋個門面幾靚，就膽粗粗入去試一試，估唔到有驚喜。老馬頭地方大同乾淨，有上下兩層。我地唔洗等位就入得。果度既侍應招呼殷勤同熱情，再望望個餐牌一啲都唔貴，而且仲有特色鵝腸點，新鮮鵝腸唔係度度有得叫，鍾意食既朋友一定要試。打邊爐最緊要個湯底，我地試左鴛鴦湯底-麻辣同豬骨。湯底足料，豬骨味香濃，唔係任食火鍋果啲一滴鮮，麻辣湯底香濃有層次唔會得一味死辣。菜到啦！牛肉我地揀左筷子牛肉同埋雪花肥牛。雪花牛唔係劣質嘅冰鮮牛，唔多肥膏而且肉味香濃。筷子牛肉係牛柳絲，肉味香濃入口即溶。韭菜餃足料之餘仲皮薄薄餡靚。丸類全部都係新鮮手打丸，新鮮彈牙。最即得叫既係炸響鈴，新鮮即叫即炸。總括嚟講，老馬頭火鍋用料新鮮物超所值，價錢相宜，依家仲做優惠，真係超抵！