新越越式料理 (已搬遷) 新店位置

以前淨係坐Office，依家要做埋行街嗰份，真係行到邊食到邊，今晚就係九龍城開餐啊！天氣悶熱想食啲湯粉，濕濕個口嘅。門口見到餐牌價錢真係好抵食，有見好多人幫襯一於試吓。咖喱牛腩河 $45 真係好耐冇見過咁平。但係湯底超香濃，小小辣啦！大大件牛腩，炆得都算軟腍河粉幼滑，吸晒咖喱湯底嘅精華，好味！同事就叫左一個炭燒香茅豬扒撈檬 $50，望落去就比較清淡所以旁邊嘅傳統越南醬汁 啱晒佢啦！鼻塞塞叫咗個雙檸蜜作餐飲，滋潤得來幾醒神。食完通粉覺得有啲空虛，追加了柚子蝦沙律 $78。柚子清新多汁，仲有好多隻蝦，個汁又小辣夠刺激。仍然未想返屋企，所以食埋個蒜蓉牛油焗大頭蝦 $168, 繼續同同事吹水直落.果然係好戲在後頭，大頭蝦啲膏加埋牛油，充滿鹹香，肉質彈牙。2人 share 都好滿足。小店裝修都算優雅，平日靜靜地可以坐多一陣。