大叻越南牛肉粉餐廳 (通菜街)

營業中

休息中

有冇人同我一樣會對某間餐廳某個餐好鍾情，每次入到呢間餐廳，無論外賣定堂食，我都只會叫同一個餐，就係炭燒豬扒飯‼️💡炭燒豬扒飯 + 凍檸茶＄58豬扒唔算等好耐，我估因為多人叫都燒定咗，但放心每次上枱都係好熱。豬扒肉質好稔，仲有肉汁。比起其他豬扒優勝嘅係，真係有一陣炭燒味，尤其啲邊邊位，係一種嗅覺同味覺重疊嘅享受。仲可以落豉油同撈埋啲薑蔥茸送飯，豉油冇咩特別，薑蔥好正，又唔會太油，一啖一啖咁食真係幾正。男朋友將個飯轉做河粉，湯底清甜，都唔錯～關於服務態度，Openrice上都見到幾多負評，鰂魚涌分店就買外賣多，通常唔多覺。灣仔分店就落單都好受氣，問多一句都好似唔想答咁。但旺角分店可能換咗批人，見個男侍應態度好好，見前面個枱個女仔凍到縮埋一舊，主動問佢要唔要調位，又會我關心我哋個枱夠唔夠豉油，整體感覺又唔錯㗎喎～環境就似普通茶記啦，冇乜特別，衛生先可以接受。