昌記

營業中

休息中

喺ig見到勁厚嘅奶醬厚多士好吸引，即刻weekend入去跑馬地食晏。熟食中心喺街市大樓二樓，搭𨋢上去一開𨋢門就有人問你幾位，因為成層有幾間餐廳，好似去咗遊客區要拉客咁… 一心諗住嚟食昌記，行到最尾最入嗰間就係。十二點幾嚟到已經滿座。侍應姐姐擔櫈畀我哋坐埋一邊等位，同埋睇定餐牌有咩食。聽講呢度嘅豬扒同雪菜肉絲都出名，用上新鮮雪菜，而非一般茶餐廳用嘅罐頭貨。食落雪菜唔會死鹹而且爽口，肉絲唔算好腍但勝有肉味豬扒煎得金黃賣相唔錯，肉質唔算好腍，味道中規中矩。沙嗲牛肉豬扒麵呢個組合好豐富，牛肉同豬扒份量都好多。沙嗲牛肉偏重口味但花生味唔係特別濃郁，牛肉嫩滑都唔錯聲稱係「全港第一厚多士」有足足5cm厚。可以牛油、花生醬、砂糖同煉奶任選兩樣。本身我揀花生醬加砂糖，但侍應姐姐有啲意見，可能太少人咁樣揀我細個喺屋企會咁樣整😂最後揀咗牛油加砂糖。多士表面燶得夠脆身，但唔會乾，麵包中間仍然鬆軟有彈性，用手指大力撳扁佢會完全回彈，根本同日本嗰啲乜乜生吐司一樣咁鬆軟！飲品點咗凍奶茶同熱奶茶，奶茶香濃而細滑，茶底幾出色總括嚟講食物質素唔錯，奶茶又好飲，而且價錢平。估唔到咁出名嘅舖頭啲侍應姐姐服務態度咁好又有禮貌。