川味王

營業中

休息中

今日收工冇乜胃口，諗住食少少嘢訴說下返工嘅辛苦。揀咗呢間幾有日式居酒屋感覺嘅川味串燒，呢種充滿特色嘅Crossover完全反映到內心對工作嘅複雜心情。上次試過燒四季豆之後簡直係上癮，今日當然唔少得啦，佢個四季豆燒得幾爽口，係唔錯嘅。另外仲叫咗個火箭魷魚筒，呢度係原隻燒完隻上，保證真材實料。佢燒到啱啱好唔會變咗魷魚乾，個味道就算靠佢燒嘅時候落嘅辣粉同埋孜然粉，所以唔會過咗魷魚本身嘅味道。另外我哋叫咗個羊肉串，個羊肉串都唔錯，啲羊肉唔會太酥，而呢一個佢都唔會太肥，啱啱好。食串燒點少得雞腎，佢呢個唔係出邊食到大大嚿嗰種。但係都唔會好柴好乾，加埋佢呢個調味係沙嗲，都幾夾味。另外仲有一個雞全翼，呢個雞全翼簡直係今晚嘅MVP。因為個外皮真係燒到脆卜卜，但係入邊嘅肉都仲係好多汁嘅。另外叫咗個燒韭菜，佢呢個韭菜都唔錯，唔會太乾/太熟，個韭菜味都好出。最後都係用咗燒菠蘿嚟做結尾，不過可能而家嘅菠蘿唔係太當造。但係燒嘅時候佢哋加咗蜜糖彌補咗呢個缺失。