輝哥私房菜 (已結業)

輝哥私房菜 適逢朋友啱啱考完試，唔使再係自修室日日坐監，於是我地幾個約出黎打邊爐。雖然係尖沙咀打邊爐嘅選擇好多，但大多數火鍋店唔係限時兼質素一般，就係太貴，係Openrice見到輝哥私房菜新開，價位又好似ok，就膽粗粗就黎試下。 火麻茶呢款涼茶店員強烈推介我地去飲，因為火麻茶有下火、降脂以及去宿便嘅作用，加上甜甜地又帶少少涼茶味，無論係功效上心理上都對準備大飲大食嘅我地非常適合。 足料豬骨鍋唔係講笑，呢個豬骨鍋足料到我以為叫咗煲湯。除咗豬骨之外，仲加咗好多蔬菜，成個湯底除咗有黑椒以及豬骨味，仲有鮮甜清爽蔬菜味，冇平時黑椒豬骨鍋咁燥熱（好似係）。 新鮮雞件可惜冇問到佢地係用咩雞，雞件嫩滑又唔會太肥，較啱時間滾起就食啱啱好，又唔會搞到成部都係雞油。 特級安格斯牛頸脊雖然佢呢度都有提供本地手切肥牛，但係唔係間間嘅火鍋店提供嘅本地肥牛嘅質素都係咁好，所以我哋都係叫特級安格斯牛頸脊。但就算係安格斯牛，每一塊牛頸脊都切到厚度均勻但又唔會太薄，脂肪嘅比例啱啱好而且又重牛味，比預期好食好多。 手打芝士鮮蝦丸呢個鮮蝦丸真係不得了，蝦滑爽口彈牙，煲極都唔會佬，加埋芝士粒，令到每一啖都激邪惡。又係必點之選。