星巴克咖啡 (已結業)

其實間間starbucks嘅食物同咖啡質素都差唔多，話晒都係大型連鎖咖啡店，總有一定嘅QC。所以我覺得去starbucks都係環境同氣氛最緊要。咁多間starbucks，我比較喜歡文化中心同LCX呢兩間，文化中心嗰間比較大，有多d大沙發，而且唔係好多人(特別係夜晚)，感覺好舒服。至於LCX呢間，唔駛多講，梗係食個景啦！面向一望無際嘅大海景，嘆住一杯香濃嘅咖啡，聽住輕鬆柔揚嘅音樂，所有煩惱自然都拋諸腦後。所以辛苦工作後，都希望嚟唞下，叉下電。試過有一次，放工後嚟嘆下，一坐就坐到八點，望出窗外，隱約見到遠處有火光，再望真d，原來係煙花。當日好好天(唔似近日咁大霧)，我諗可能係望到迪士尼嘅煙花，真係可遇不可求，心情輕鬆d，睇到嘅嘢都靚d。呢個話晒都係「食」評，點可以唔講下食呢！原來starbucks嘅芝士多士好好架！從來喺個櫃入面都唔起眼，點都唔會揀中佢，不過有一次夜咗d，個櫃差唔多「吉」晒，剩返一兩件芝士多士，好啦！就試下啦！店員幫我焗返熱，熱辣辣真係唔同d，多士依然香脆，芝士好香，值得一試。