漁舍酸菜魚 (已結業)

之前嚟過北角滙食嘢，發覺呢度都幾多嘢食，今日就約咗朋友嚟呢度嘞，揀咗呢間食川菜嘅！地方都好大坐得好舒服！見到好多人食酸菜魚同雞煲，掙扎咗好耐之後就揀咗叫雞煲！叫咗個前菜麻辣皮蛋涼拌豆腐，本身以為係酸酸辣辣，但因為佢應該係加咗梅子，所以味道係甜甜辣辣咁，味道都幾新鮮幾得意，好開胃，用嚟做前菜真係一流！本身我以為個雞煲係好似出面咁，食完用嚟打邊爐，但店員話呢度嘅做法係揀好哂嘅配菜會一次過咁炒埋落去，咁我哋就揀咗金菇、油麥菜、枝竹等幾個配菜！嚟到見到好熱辣辣，賣相好吸引而且份量都好多！輕輕再炒炒就食得嘞！雞件好嫩滑，成個雞煲辣度都好夠！枝竹吸收晒雞煲嘅汁所以好惹味！本身嘅雞煲都有好多附帶嘅配菜，好似呢啲萵筍咁，好好食！食完飲返杯青檸梳打解辣真係一流！今次呢個雞煲好食得嚟又好有新鮮感，下次嚟會試埋呢度嘅酸菜魚！