麻辣小聚 (Ladder Dundas) (已結業)

朋友話之前食過喺Togetda網上預訂，可以有優惠價5折食招牌火噴噴香辣套餐或者回味水煮鍋/香辣干鍋加90分鐘任食鴨血同古早黑糖冰粉，叫我選擇一個，因為我一向都鍾意食蟹，所以就簡咗香辣套餐。招牌香辣蟹，都幾大碟，隻蟹份量都幾大，d辣味入晒落蟹肉入味，仲有入面有大量辣椒乾，蔥同花生一齊炒，好惹味。回味水煮魚，d魚肉好厚，好嫩滑，呢度嘅水煮唔太油，入面仲有芽菜，百葉，雲耳做配菜，吸收晒d水煮汁，好正。藤椒手撕雞，呢個涼菜都幾好味，雞肉食落好嫩滑，仲有少少麻麻地嘅味道，連埋d配菜青瓜，紫洋蔥，芫荽一齊食，幾好食。蒜子魚湯泡翡翠苗，d菜好新鮮好嫩，入晒魚湯嘅鮮味。中，比炒菜更好味，因為完全唔油膩。老成都風味炒飯，個飯炒得唔太油膩，粒粒分明，食落有少少煙燻嘅味道，睇真d佢嘅飯有d一粒粒嘅臘腸，應該係成都臘腸有煙燻嘅味道，都幾有新意。黑糖桂花冰粉，個涼粉係透明，我之前都未食過，個涼粉本身冇味，不過佢地就加咗黑糖同桂花，所以味道方面帶有少少黑糖嘅甜味同桂花香味，老闆話冰粉解辣最一流。原來老闆話8月31日前購買會有8折優惠，已經約埋朋友下次試埋另一個餐。