阿純山東餃子

營業中

休息中

邊個話米之蓮餐廳一定係貴㗎，今次等我M佬帶A姐去試下位於太子嘅阿純山東餃子，係我最愛嘅平民米之蓮餐廳。阿純山東餃子裝修一啲都唔靚仔，類似茶餐廳嘅setting，四圍貼咗好多食物相。如果多人嘅時候，真係會好迫。好似今次早去有卡位坐。一坐底，就有伙計送上清茶嚟，唔講唔知原來嗰杯清茶係山東名產磱山綠茶，不過飲落去無咩味，好似飲水咁。既然間餐廳叫做阿純山東餃子，招牌菜就梗係餃子啦。呢到嘅餃子係每日新鮮包，晏啲嘅話，某幾款餃子會可能賣晒。我哋今日叫咗香芹鮮肉餃同西洋菜鮮肉餃。望落去兩隻餃嗰樣差唔多，好難分，但一食落口就好唔同。A姐食到嘩嘩聲，話好香芹菜同西洋菜味，又好多汁。不過我覺得嗰皮無以前咁薄，但係都好好味。鐘意食香口嘢嘅朋友，可以加五蚊食煎餃。除咗餃子，呢到嘅其他嘢都好正，其中我每次都會叫芥末黑木耳，少少黑醋加少少芥末，okay醒胃。加上黑木耳有可降低膽固醇，控制血糖，幫助排便，提升免疫力。鐘意飲酸辣湯嘅朋友一定要試阿純嘅酸辣湯。呢到嘅酸辣度啱啱好，又夠足料。不過A姐覺得好似辣得滯。另外，我哋仲叫咗嗰招牌阿純炒飯，其實同楊州炒飯差唔多，有蛋，有葱，有蝦同雞肉，不過炒得唔夠乾身，唔建議大家試