廣豐美食 (已結業)

而家真係唔敢出去食，只可外賣返屋企食。屋企附近啲餐廳都已經食到厭。落小巴時，老公提議不如買啲小食返屋企。一向係廣豐美食老顧客，佢地既格仔餅好好食。格仔餅同雞蛋仔都係$10.一底新鮮熱辣做起，又焗到岩岩好，外面少少脆，入面又唔會太冧。燒賣魚蛋係我既最愛，平時諗唔到煮乜都會順便買返一碗返去做餸，燒賣魚蛋，10蚊十粒，真係平到笑。最鍾意加上少少佢哋秘製辣汁，好好食。煎釀三寶$10四個，今日買咗$30咁又一隻餸啦。最鍾意係佢哋呢度買煎釀三寶，雖然啲三寶係一早做起同炸起咗，但係你買咗之後佢哋會再炸熱一次俾客人，咁就可以食到熱辣辣嘅煎釀三寶。我同老公大愛炸大腸$12一串。超脆既外皮，一咬落去，仲有少少汁滴出黎，落埋芥辣、甜醬，食落大腸味濃郁滋味。炸雞脾$16一隻。大大隻，老闆係炸之前，在雞髀身界了幾下，等雞髀入邊可以快啲熟，做到外皮酥脆，而裹面不會太老。街邊小食買返去做餸都幾好。價錢又平，最緊要係每樣野俾你前都會翻熱，就甘拎返屋企開嚟食就得，夠晒方便。