東京和食SUN (已結業)

又有老友生日，俾佢五揀一，最後決定呢間。記得舊年食過一次，服務同食物各方面都唔錯，所以沒有異議。芒果彩虹卷-因為芒果太搶，只食到芒果香味。牛油果軟殼蟹卷-軟殼蟹真的太少，一口咬下去，唔覺有軟殼蟹存在。燒汁鵝肝法包-今次比上次好，唔會過熟，而且又冇根。油甘魚、甜蝦及赤貝刺身-油甘魚是勁厚切，但係一d都唔覺得好肥美、甜蝦亦不覺好新甜、赤貝是原隻上，算不錯。芝士蟹肉波菜王子-份量好細好細，所謂的蟹肉鮮味欠奉，我覺得似日式蟹柳。豬頸肉沙律-唔錯唔錯，豬頸肉又嫩又爽；雜菜沙律酸酸地幾醒胃。鐵板牛舌-雖然切得好薄，但勁韌。米紙三文魚卷-這個是後加的，上次食覺得幾好食，今次食覺得完全冇味，可能食了以上濃味食物關係。天婦羅烏冬-烏冬好彈牙煙韌，湯亦唔錯。雜菌蠔仔釜飯-這個我幾欣賞，雖然蠔仔唔多，但飯是珍珠米，粒粒通透煙韌，仲有少少飯蕉、幾香口。最後當然唔少得就係紅豆雪榚啦，一樣咁好食。