FAMA (已結業)

今日陪朋友大埔去睇醫生，睇完醫生諗住搵個地方hea吓，咁岩見到呢間cafe就入去睇下。 一入到去，嘩好多board game同漫畫，我就知係呢到過足全日絕對無問題👍🏿。 今次同朋友兩個叫咗一個美國牛扒配美國雞胸，同埋煙肉雞柳鮮蝦扁意粉。因為呢度係自助形式，喺等食物嘅時候我哋就自己去咗攞武器-刀同叉。係攞緊刀叉嘅同時，竟然俾我發現到辣椒仔,我最愛。攞咗埋位之後我哋就坐咗響側邊嘅梳化一本漫畫一路排一路等，漫畫種類都好老少咸宜，有叮噹同蠟筆小新，又有懸疑嘅偵探學園Q，仲有經典嘅龍珠。唔好以為剩係得適合大人嘅漫畫睇，重有大量嘅兒童圖書，一家大小來玩又啱，幾個朋友都啱。睇左一陣漫畫，手上既提示器就響起，咁我哋就去攞食物啦。兩個食物同時到達，唔會話一個上先一個上後，無左要慢慢等埋另一個先食得嘅情況發生。牛扒同雞胸都非常之鮮嫩，另外都會配番茄同埋蘆筍，食肉獸之餘仲有啲菜俾你，配上薯角飽腹感啱啱好。雞肉大蝦意粉上到黎比想像中多材料，而且軟硬啱啱好。另外我哋仲嗌左榛子朱古力同鮮奶咖啡，原本以為都係普通貨色，點知榛子味超級濃郁飲完滿滿既幸福感即刻返晒黎而鮮奶咖啡亦都好香奶味令到杯咖啡非常之順滑。