美味餃子店

營業中

休息中

旺角太子都應該係香港最多餐廳的區域，係呢度要做咁耐生意，仲要長期keep住有人排隊食的餐廳一定係有高水準的食品。夜晚7點都未到黎到門外，已經見到有10幾人排隊，真係唔出奇。絕對唔係人排我又排的心理，而係之前食過一次，知道排一陣隊係絕對值得，大家目的都係為左呢間小店的餃子。好的菜色貴精不貴多，一個野葛菜煲生魚豬骨湯同大大隻飽滿的餃子已經好吸引。大碗的雲耳椰菜肉餃拼白菜餃，一咬落去鮮肉汁爆發，加上椰菜的自然甜味，簡單味美。北方餃子皮比南方餃子皮厚實一點，亦因為咁先可以包更多的材料。一碗十隻加上飲晒D湯真係幾飽。 湯底係冇味精野葛菜煲生魚豬骨湯，清甜又潤喉，好多人都專門黎都係為左啖湯。另一個煎雲耳椰菜肉餃，新鮮滾熱辣煎出黎的餃子係金黃色充滿香味，一口咬落去非常脆口的表皮，再加上啖啖多汁的豬肉同椰菜，令人食唔停口。再加上秘製辣椒油，香口又惹味的味道真係愛辣之人必試。整體上絕對可以講係平靚正，睇住D姐姐係店內不停咁包餃子，真係睇到同食落都覺得新鮮。絕對值得食過再食呀。